O sector da lousa de Valdeorras contou este mércores cun novo respaldo institucional por parte da Deputación de Ourense, que reafirmou o seu compromiso coa “visibilización e comercialización dun produto fundamental para a comarca e a provincia”. Así o manifestou o presidente da institución, Luis Menor, nunha xornada de traballo celebrada en Carballeda de Valdeorras xunto á directiva do Clúster da Pizarra de Galicia.
Acompañado pola vicepresidenta primeira, Marta Nóvoa, e a deputada delegada para Valdeorras, María del Carmen González, Menor destacou o papel estratéxico da pizarra como motor económico da zona. O sector xera máis de 2.400 empregos directos —un 25 % ocupados por mulleres— e uns 10.000 postos indirectos, representando o 26 % do PIB comarcal.
Durante a reunión celebrada na sede do Clúster, avanzouse a celebración do “Día da Lousa” tras o verán, un evento que terá lugar no primeiro Concello Mineiro de Galicia, Carballeda de Valdeorras, co obxectivo de achegar o sector a toda a provincia e dar un novo impulso á súa promoción.
Turismo industrial como nova vía de desenvolvemento
A xornada tamén serviu para poñer sobre a mesa as posibilidades que ofrece o turismo industrial como complemento económico e ferramenta de difusión. Neste sentido, a Deputación e a Xunta traballan conxuntamente co sector empresarial para impulsar un proxecto pioneiro que permitirá visitar explotacións de lousa e contornas naturais da comarca, fomentando así o coñecemento do sector e promovendo un modelo que compatibiliza actividade extractiva con respecto ambiental.
Tras a reunión institucional, os representantes visitaron unha nave de elaboración e unha canteira, completando unha xornada centrada en coñecer de preto a realidade da industria da pizarra.
Peticións do alumnado de Sobradelo
Ademais, o presidente da Deputación recibiu a visita dun grupo de estudantes do CPI Tomás Terrón Mendaña de Sobradelo, que aproveitaron a ocasión para trasladarlle dúas peticións: o arranxo da pista de fútbol do colexio e a construción dun rocódromo nas instalacións escolares.
